الأحد، 1 يونيو 2008

امتي يا ماما هيجي علينا الدور

سالني ابني السؤال دة واحنا واقفين امام التواليت في احدي المولات الكبري وكانت الدنيا زحمة جدا جدا وطبعا علشان انا لسة متعلمتش ابقي غجرية وابني كمان الصغنن برضة مش عارف يبقي غجري فدخلنا وفضلنا واقفيين مستنيين الدور وان الدور يجي علينااااااا ابداااااااااا
لحد ما رفع ابني وشة وسالني ببراءة الاطفال يلا يا ماما احنا مستنيين اية ؟؟؟فبصيت لة ورديت مستنيين دورنا فرد وعلي وشة كل علامات الاستغراب يعني اية دور؟ دة كل الناس دخلت الا احنا فبصيت لة وابتديت اشرح لة ان احنا لازم نستني دورنا ...وان احترام الدور دة بيخلق مننا بلد متحضر. واننا حتي لو الناس اللي حوالينا اتصرفوا غلط لازم احنا نكون قدوة وفضلت اتكلم كلامم مم كلامممم
فوجدت سيدة بجانبي ترفع راسها وترد باستغراب !!وقالت لي يعني انت مش هتدخلي ابنك خالص .هنا محدش بيستني حد انت تدخلي تقفي قدام اي باب وتستني واول ما اللي جوة تخرج تدخلي علطول ومتستنيش دور ولا حاجة
فضلت واقفة وكلي تصميم اعلم ابني الالتزام بالدور لحد ما لقيتة بيقولي اةةةةةةة انا فهمت ؟؟؟ استني الدور يعني مدخلش ابدااااا ,,انا بقة مش عايز التزم بالدور انا عايز ادخل الحمام
فتداركت الموقف بسرعة وقلت الغجرية ست جيرانها وقلت لة خلاص احنا مش هنستني الدور احنا هندخل حالالالالالالالالالالالالالالالالالالالالالالالالالالالالالا انسي يا حبيبي كل اللي قلتة لك..........

الخميس، 15 مايو 2008

ضريبة التمييز

فكرت اكتب كتروفضلت الفكرة تلح عليا لما قالت لي واحدة صاحبتي علي فكرة التدوين
بس مكنتش لاقية الفكرة اللي محتاجة قوي اكتب فيها لحد ما ظهرت الفكرة والحت عليا لوحدها وفضلت تزن تزنننننننن تررن
ولو تلاحظوا انا سميت نفسي الغجرية ست جيرانها وانا للاسف مش ست جيراني ولا حاجة دة بس الملاحظ دلوقتي ان اللي بيعرف ياخد حقة في الزمان دة لازم يغجر وصوتة يبقي اعلي فيكسب
المهم مش هطول عليكم القصة وما فيها ان والدي اشتري حتة ارض في 6 اكتوبر وبني عليها بيت صغير ودفع الراجل يا عيني اقساط لحد ما سدد كل الثمن ونجح انة يبني لنا بيت صغير واتضح انة وهو بيسدد في ثمن الارض بيدفع زيادة 10% علشان قيمة تمييز ولما سأل قالوا لة ان الارض تطل علي ميدان وطبعا دة تمييز علشان انت هتستمتع بالاشجار والازهار والعصافير لما تقف علي الشجر قصة طويلة ةةةة كدة
المهم دفع الراجل علشان ميخدوش منة التمييز زي عادل امام ( خاف لا يشيلوا العدة )في شاهد ما شافش حاجة
والميدان دة فضل فترة كبيرة جدا عبارة عن مخلفات كل المباني لحد ما عملنا اجتماع عائلي وقررنا عدم انتظار الحكومة تعمل لنا كل شيء وقررنا الاستغناء كل شهر عن مبلغ علشان نزرع احنا الجنينة ونستمتع بقة بالهوا والعصافير ,,,,,,,,,, وفعلا زرعنا الميدان ولما شافنا الجيرا كل واحد زرع اما م منزلة
لكن صحينا من النوم في يوم علي ناس بتدق حديد وحاجات غريبة في الميدان ؟؟ انتم مين يا جماعة !!!!!!!!!!!احنا من شركة المحمول هنركب لكم هنا جهاز تقوية لاننا سمعنا ان بقالكم فترة بتشموا هواء عليل وبتستمعوا بلاشجار طب يا جماعة مهو هو دة التمييز ؟ قالوا لا كفاية كدة تمييز احسن تتعودوا علي كدة تبقي مشكلة وبعدين كل المسئوليين بياكدوا ان دة مفيهوش خطورة( ملحوظة عمري ما سمعت ان فية مسئول واحد فوق بيتة او جنب بيتة ابدا جهاز تقوية ولو فية يا ريت يقولي )
وفي الحقيقة انا مش مستغربة خالص لازم طبعا انهم يركبزا لنا جهاز تقوية علشان الاطفال تبقي قوية كدة وعفية مش دول جيل المستقبل ولا ايةةةةةةةةةةةةةةةةةةة!!!!!!!!!!!