سالني ابني السؤال دة واحنا واقفين امام التواليت في احدي المولات الكبري وكانت الدنيا زحمة جدا جدا وطبعا علشان انا لسة متعلمتش ابقي غجرية وابني كمان الصغنن برضة مش عارف يبقي غجري فدخلنا وفضلنا واقفيين مستنيين الدور وان الدور يجي علينااااااا ابداااااااااا
لحد ما رفع ابني وشة وسالني ببراءة الاطفال يلا يا ماما احنا مستنيين اية ؟؟؟فبصيت لة ورديت مستنيين دورنا فرد وعلي وشة كل علامات الاستغراب يعني اية دور؟ دة كل الناس دخلت الا احنا فبصيت لة وابتديت اشرح لة ان احنا لازم نستني دورنا ...وان احترام الدور دة بيخلق مننا بلد متحضر. واننا حتي لو الناس اللي حوالينا اتصرفوا غلط لازم احنا نكون قدوة وفضلت اتكلم كلامم مم كلامممم
فوجدت سيدة بجانبي ترفع راسها وترد باستغراب !!وقالت لي يعني انت مش هتدخلي ابنك خالص .هنا محدش بيستني حد انت تدخلي تقفي قدام اي باب وتستني واول ما اللي جوة تخرج تدخلي علطول ومتستنيش دور ولا حاجة
فضلت واقفة وكلي تصميم اعلم ابني الالتزام بالدور لحد ما لقيتة بيقولي اةةةةةةة انا فهمت ؟؟؟ استني الدور يعني مدخلش ابدااااا ,,انا بقة مش عايز التزم بالدور انا عايز ادخل الحمام
فتداركت الموقف بسرعة وقلت الغجرية ست جيرانها وقلت لة خلاص احنا مش هنستني الدور احنا هندخل حالالالالالالالالالالالالالالالالالالالالالالالالالالالالالا انسي يا حبيبي كل اللي قلتة لك..........
الأحد، 1 يونيو 2008
الاشتراك في:
تعليقات الرسالة (Atom)
هناك 11 تعليقًا:
هههههههههههههههههههه
هههههههههههههههههههه
ياحنى يا حبيبتى يا غجريه ما لقتيش غير الحمام و الولد مزنوق و تعلميه الدور
ده انتى تخشى تقومى الست اللى قاعده الاول و تفكى زنقته و بعدين علميه؟
ههههههههههههه
ياحرام يا غجريه...ربنا يعينك على تربيتهم فى زمن زى الزفت
غجريه...انا جيت و سبت تعليق...إتنشل
عندك حراميه فى المدونه
قولى كده انت عامله مصفى....مش تقولى قلت فى عيل مستخبى بيسرق التعليقات
ههههههههههههههههههههههه
في ناس بتفتكر إن الكارتون اللي بيظهر فيه أبطاله نوع من العنف، زي سوبرمان وأولاد عمه، الباتمان، وسبايدرمان إلى آخره، ممكن أوي يعلم أولادهم العنف، وغالبا الناس دي بتمنع أولادها إنهم يشوفوا النوعية دي من أفلام الكرتون... طبعا كل واحد حر في إختيار الطريقة اللي يعلم بيها أولاده...، بس سيادتي بأه ما إقتنعتش بوجة نظرهم...، صحيح هيه فيها شيئ من الصحة، بس في عالمنا ده، الغلط فيها أكتر من الصحة... ليه؟ لو أولاد الناس دي فعلا منعوا من مشاهدة أفلام كرتون فيها بعض العنف، في غيرهم آلاف (إن ما كانش ملايين) الأولاد التانيين، اللي بيشوفوا كل يوم حاجات أعنف بمراحل من سوبرمان وولاد عمه...، والمشكلة بتييجي، لما ولاد الناس "المحافظين" يلتقوا مع أولاد الناس اللي موش في دماغهم...سواء في المدارس أو الأندية أو المولات أو أي مكان، ساعتها مفيش غير أولاد المحافظين هم اللي بيتظلموا، وبينضحك عليهم... والغريبة إن سبب ظلمهم بيكون خوف أهلم عليهم...، الحكاية دي فيها كتير أوي من حكايتك... ما أقدرش أقول إن إنتي غلطانة، بس برده، ما أقدرش أقول إن ده صح...، مفيش أجمل من النظام، والمحافظة على الأدوار لما يكون فيه طوابير، بس فيه حاجة مهمة أوي لازم تخلي بالك منها وهي إنك لو ما قدرتيش تنظمي، حاولي إن إنتي ما تتظلميش...، في الموقف اللي حصل معاكي، إنتي ما حاولتيش تنظمي (ودي حاجة أعذرك فيها لأنها غالبا بتحتاج لراجل جامد وصوته عالي... لأن الناس دايما بتكش من الصوت العالي، أو عاوز واحدة موش بس غجرية، لأ... غجرية ومستبيعة)... وكمان إنتي إتظلمتي... وده كله حصل قدام إبنك... يعني الهدف النبيل اللي كنت عاوزه تحققيه، وهو أن تزعي في إبنك إحترام النظام، كان سبيلك الوحيد لتحقيقه هو تقبل ما يحدث من فوضى، زائد تقبل الظلم...، هسيبك إنتي تحسبيها وتستنتجي أيه اللي أهم لإبنك إنه يتعلمه وينزرع فيه
لا يا مفروسة محدش بيسرق التعليقات واية اخبار الموتور خليك غجرية والا هتلاقي الموتور اتركب جوة اوضة ماما مش تحت الشباك
هنا وهناك انا سعيدة بيك جدا وبانك بتحب احمد منيب اصل انا بحب الموسيقي
انا قرأت تعليقك مرتين وبصراحة شدني ومقتنعة بكلامك جدا وهو دة اللي بحاول اعملة طول الوقت الموازنة بين اني متظلمش وفي نفس الوقت احافظ علي النظام.بس في الحالة بتاعتنا دي قانون التواليتات بيقول انك اول ما تدخل تحدد هدفك وتقف قدام اي باب واول ما اللي في الداخل يفتح الباب تدخل جري ملكش دعوة بقة انت دورك ايةةةودة لا ينطبق علية لا النظام ولا الظلم دة وسط بين كل دول
ماينفعش نمشي نظام الدور علي ناس وناس لأة
يإما نلتزم كلنا بالدور ياإما ماحدش يلتزم ... مش يبقي انتي لواحدك اللي مستنية واللي جاي بعدك يدخل قبلك
دور مين حضرتك
دورك بدراعك فى بلدنا ده
عودة حميدة للتدوين
غجريه يا صحبتى اختك نشرت بوست هنا
http://faransaraayek.blogspot.com/2008/06/blog-post_07.html
اسفة يا جماعة لي التاخير الغجرية كانت مسافرة ورجعت وعندي كلام كتيرررررررررررر
وطبعا مبسوطة بكل اللي بيعدي علي مدونتي ويزورها
ادم المصري برحب بيك وبقولك اهلا وسهلا بيك في مدونتي المتواضعة
انتي يا بنت يا غجريه
ليه مش بتكتبي من زمااان
انا سمعت ان ضهرك واجعك ليه كده؟؟
يارب تخفي بسرعه و ترجعي تكتب تاني
إرسال تعليق